Hikayat 24 Thon Serambi (1)

Karya H Sjamsul Kahar

SALAMUALAIKOM karyawan Serambi
Haba lon rawi deungo beurata...
Haba lon peuphon  pujoe keu Rabbi
Seulaweuet keu Nabi Rasul mulia..

Ngon lheueh nibak nyan horeumat ulon bri...
Keu bapak Mawardi nyang badan raya....
Keu Bapak M Din tabek sikali.....
Gob nyan that ahli ulee geuh raya....
Syedara laen hana lon rinci ....
Mandum lam hate sayang lagoi na.........

Lon lakee meuah mandum syedati...
Karyawan Serambi nyang keunoe teuka...
Hana ulon kheun pidato resmi....
Reusam lon rawi ngon hikayat  saja...
Peulom ulon duek ateuh keurusi  
Ka saket gaki ulon katuha.......

Bah keuh meunan hana peue neu ci ....
Bak maen seudati mantong that teuga........
Meunan syedara haba lon rawi...
Lon buka kunci keugura-gura......

Nibak uroe nyoe cit HUT Serambi....
24 thon Potallah bri jinoe usia.......
Ngon Rahmat Allah lindongan Rabbi......
Group Serambi beu maju jaya........

Ingat seujarah yoh phon berdiri...
Koran Serambi sosah lagoi na.....
Sideh di Lampriek nyang phon jadi....
Buka redaksi bak rumoh sewa......

Ngon Pak Nourhalidyn nyang ureung Bambi...
Keurija rodi kamoe mandua...
Mandum karyawan cit muda mudi......
Seumangat mengabdi luar biasa..

Meunan keuh lagee di abang Mawardi..
Meja produksi gob nyan yang jaga…
Gabeuk that gob nyan malam ngon pagi..  
Malang that bagi hanjeut ek Honda

Bah keuh jinoe moto meuriti...  
Gadoh mat gunci geuba hantom na
Laen lom teuma Bang Is nyang tari…  
Ngon vespa Itali gob nyan meugaya…
Meubungkai meuh keubah lam laci
Bak adek nyang tari keunan peuhawa...

Bang Naser Yusuf  laen lon rawi....
Jameun ka meuri kriet meutaga
Hana peue harap geubayeue kupi.....
Nyan keuh meudali jinoe ka kaya......

Nyan bapak M Din wartawan ekonomi...
Geu ek labi-labi tamong keurija....
Bapak Nurdin Syam teuga ek gari......
Ahli bhaih tani wartawan muda....

Di bapak Yarmen gagah han sakri ......
Mandum sinyak Ti meuputa-puta..
Pak Nasir Nurdin peudeh that bagi.......
Tamong Serambi lewat jendela....
Han geujuet tamong lam ruang redaksi...
Gob nyan that ngeri Ulon blie mata.......

Laen lom kisah di kakak Nani....
Cit Inong tari seujak phon muda...
Uroe ngon malam dikawai le suami....
Bek dicok le pancuri bak jak keurija....

Han ek lon kisah nyan muda mudi........
Dalam Serambi na yang meucinta.....
Lagee Teuku Maimun ngon kak Juhaini...
Lam ruang redaksi geumaen mata......

Meunan cit lagee di kakak Sri......
Ngon abang Beini jadeh meubahgia......
Di abang Darman bacut lon rawi ......
Geusente kak Herwani yang meukacamata.....

Abang Akmal dudoe jeuet keu bupati....
Geuikat janji deungon kak Ida......
Han lon jeuet peugah na dua droe Abi.......
Ngon sunnah nabi peureumoh dua......

Cit leupah hayeue aneuk Serambi....
Na macam bagi cit that meugaya.....
Ladom keu dewan ladom bupati....
Nyang meusireuek gaki tamong peunjara...