Hikayat 24 Thon Serambi (2)

Thon sikureueng lhee pinah Serambi....
U bineh pasi jalan Krueng Raya..
Gampong Baet nama geurasi....
Di sinan syaidati kanto that raya.....
Seujak watee nyan maju Serambi ....
Beredar pagi Aceh meurata.....

Nyang jaga kanto na sikuriti...
Tamah Pak Ali preman tuha..
Tapike aman geujaga rapi.....
Teuma oh pagi kagadoh honda.........

Nibak wateenyan pimpinan Serambi....
Cit meunan bagi meugantoe tuka....
Manajer Keuangan Bang Ahmad Bakti....
Manajer Sirkulasi M Din bernama…
Abang Darman PP pun jadi.....
Erwiyan Safri Redaktur Pelaksana…
Abang Akmal geuboh keu waki..
Hantom rah gagi geuteungoh lampaya.....

Bapak Nurdin Syam sekretaris redaksi....
Abang Buchari meublek-blek mata....
Abang Rokan wartawan pulisi....
Bak haha hihi hana soe tuka.....

Nyan Bang Yarmen ureueng that dendi....
Redaksi Kontras gobnyan peutua...
Di Abang Bedu nyang ka taturi....
Mat gayong kupi penyampoh raya....

Oh teuma dudoe pindah u redaksi...
Gob nyan that ahli bak rah-rah gamba.....
Nyang duek bak modem na abang Uli....
Ibrahim Aji radio geujaga

Nyang that paloe Abang Mawardi.....
Geumat redaksi waki kepala
Meunan lon boh gob nyan keu waki....
Bak keude kupi kanto geubuka.........

Bang Nasir Nurdin bacut ka meu hi......
Bak reunyun redaksi meugisa-gisa...
Hana teumakot le ulon tuan blie...
Sawueb ka resmi wartawan kota.....

Abang Isma-e cit ka taturi...
Gampong asli di Jangka Buya...
Ngon sedan starlet geu ulai-ili....
Di lua Serambi geupeudieng Nona.....

Rame that laen han ek lon rawi.....
Seujarah Serambi panyang lagoi na.....

Masa prang konflik Allahu Rabbi.....
Koran Serambi dalam bahaya......
Sabe ancaman di sana sini......
Hana tatukri peugot berita......

Menoe salah meudeh pih dibenci......
Ureung redaksi kabeh ditanda...
Nyang that peudeh bak malam hari......
Hana beurani jak woe keurija..

Poh lapan malam kota ka sepi……
Bak jalan ngeri hana suara…
Mandum payah dom lam kanto Serambi......
Ateuh kurusi atawa meja....

Bukon le sayang nyan ibu Nani......
Meuyeub kurusi ka geuleueng tika....
Payah meulapeh  geusok luwue Li.....
Takot jen pari datang meuraba.......

Yang that peudeh supe sirkulasi....
Poh limong pagi moto keuluwa...
Sipanyang jalan bahaya that ngeri....
Swiping TNI kayem that TNA.....

Abang Samsudin ureueng beurani....
Ji-sam-su geubri nyak bek ditampa...
Moto yang dithet sikurueng biji.....
Sideh di Idi moto disandra....

Lheueh nyan panggilan Abdullah Syafi-i.....
Urueng mat gunci tantra TNA
Deungon Pak Nour lontuan sa-i....
U pucok Sigli jak peutrang haba....

Hansep oh nyan, na ancaman mati ...
Lagee keudidi lon pleung u Jawa......
Baro phon lon woe karap tsunami.....
Lam kanto Serambi ulon leueng tika...

Meunan keuh bala teukeudi Illahi....
Teuka tsunami lheueh geumpa raya....
Habeh digulong ban saboh negeri.....
Kanto Serambi hanco ube na...

Nyan meusen cetak cit ka meuguli.....
Dudoe ta ungki di dalam paya
Seudeh bukon le karyawan Serambi.....
Woe bak Ilahi limong ploh peuet syuhada....
Taroh ie mata malam ngon pagi.....
Doa bak Rabbi beu asoe syuruga.....

Bah lam duka ureung Serambi....
Seumangat Tuhan bri bangket bersama...
Sideh Lambaro buka poih pagi ...
Melapor diri nyak meupeue haba...

Kadang kahabeh kadang jiba le ie…..
Nyang saket-maket peu ubat teuma….
Meunan bantuan dari Beutawi ...
Troh breueh meuguni geukirem saka....

Bapak Sutrisno yang mat keundali.....
Bilueng geubagi ade beurata...
Na limong uroe ngon lheuh tsunami....
Koran Serambi jiteubiet teuma..

Cetak di Lhok buka redaksi....
Nyang mat keundali bang Is ngon Persda
Hana trep teuma kerja redaksi …
Di jalan u Ili  keu sementara….

Kanto Beurawe cit hansep kurusi…
Tiap hari payah meudawa…..
Kanto bisnis bak mes Serambi….
Alah hai akhi anco that rupa…

Ladom napat duek ladom berdiri…
Nyang laen lagi di ateueh tika……
Leubeh sithon lagee nyan bagi…  
Koran Serambi meugah u luwa

Jamee le that troh dari lua negeri…
Ureung Itali, Inggreh, Beulanda….
Soe soe nyang troh geucatat rugi…
Mandum meujanji geukirim dana…

Troh ngon uroenyoe tan meusitali….
Ureueng meujanji ka dijak let ma…
Untong na Kompas nyan grup sendiri….
Geuyue peurinci ato rencana

Padum yang abeh pinjaman geubri…….
Kanto Seranbi beubagah na…
Meunan keuh adoe lon ulai-ili …..
Keudeh Beutawi bak kanto Persda..

Watee nyan teupike tawoe u pasi …
Rehab kembali nyan kanto lama
Sawueb mantong kong mandum kontruksi …..
Lom pih kapasti ka hemat dana

Soe-soe lon tanyong alasan geubri….
Takot jen pari sideh meudoda..
Peuelom uroe jeh na haba Pak Ali….
Bak kanto redaksi macam jen that na…

Meubagoe su oh malam hari…
Meja ngon kursi meuputa-puta…
Na cit su inong jimoe meu - ie - ie……
Ante geujeunguk ureung ka hana …….

Leupah that gura karyawan Serambi…..
Haba Pak Ali geutamah saja….
Mandum meungaku mereumpok jen Pari….
Meulomba ngeri bak karang haba..

Ulon teujalok geusaja le Pak Ali…
Haba jen pari cit atra yang hana
Mangat mudah keurija pancuri…..
Oh pagi hari ka gadoh saka……

Aleh saweub nyan Bapak Mawardi....
Ancaman geubri leupah get nyata..
Geukheun bak lontuan berkali kali...
Bek woe u pasi peugot rencana..
Meunyo cit jadeh puwoe Serambi....
Yeu keurija sendiri digobnyan hana..

Sawueb lageenyan pilehan ka pasti....
Peudong Serambi di batas kota
Hana paduli meuhai konstruksi.....
Kanto Serambi yang anti gempa....
Takalon kanto meugah hansakri...
Sayang that hi ban gudang senjata..