Siplôh Tanda Kiamat

Dengön bismillah mulai kalam
Lôn pujoe Tuhan nyang maha kuasa
Rayeuk kuasa nyang peujeut alam
Cit sidroe Tuhan Allah ta’ala

Nibak kalinyoe lôn neuk ratôh
Tanda yang siplôh kiamat teuka
Nyoe kon rika kon haba nyang broeh
Tanda nyang siplôh lam Quran nyata

Tanda nyang keuphon nabi geusampoe
Ban sigom nanggroe jiteuka geumpa
Teuma keudua tanda geusampoe
Bansigom nanggroe ie raya teuka

Teuma nyang keulhèe wahé e gurè
Teumutông dum keudè gampông ngon banda
Haba teumutông mandum ka jithè
Banmandum keudè ka sama rata

Lanjut lom aduen tanda nyang keupeut
Prang jipeubuet hana jireuda
Prang saudara sabé jipeubuet
Sabe geumubuet prang syèdara

Tanda keulimong laén lom bago
Ban sigom nanggroe toko meubanja
Barang ngon harga hana jisato
Ji meukat keudroe kri nyang hawa

Jino takalön tanda nyang keunam
Meuleumpah seunang ureung lam donya
Jinoe ka kaya barokön gasin
Han lé meukuwin di  lam tika

Tanda keu tujoh wahé dum apa
Dilèkön kaya jinoe ka papa
Tanda keulapan wahé e cut da
Ureueng meulumba ek haji teuka

Ram’e that ureueng nyang ék u haji
Tan paduli p’eng hareum atawa suci
Mungkén jih kaya meuseubab judi
Nibak kompeni diseumah gaki

Tanda sikureung hayeu lom macam
Inong ngon agam tan lé meubeda
Leupah that gura inong ngon agam
Ka sabé padan awaknyan dua

Inong sôk luweu agam panyang ok
Ka sabé anggôk ka sabé padre
Teuma di agam ka lagè jén jôk
Inong ka jisôk siluweu apa

Tanda keusiplôh nabi geusurat
Ubéna rakyat meularat cut da
Rakyat ban kam’eng lam uroe meuhat
Peumimpin rakyat lagè ban singa

Kasep keu ‘ohnoe riwayat lôn tuléh
Ulôn neuk jak éh malam ka jula
Dipat na cidra cae lon tuléh
Neutulông waréh peugah beusigra

Mawardi, mahasiswa FKIP PBSI ’10 Unsyiah