VIDEO Berita Lam Bahasa Aceh - Saudagar Aceh Mulai Program Peutumbon Leumo di Gorontalo

SERAMBINEWS.COM – Assalamualaikum Syedara Lon. Alhamdulillah mereumpok lom nibak program Berita Lam Bahasa Aceh di Serambinews.com.

Kali nyoe kamoe meuba saboh haba yang cukup meusaneut dari Toke Ismail Rasyid, saudagar multinasional asai Matangkuli Aceh Utara.

Ureung po syarikat PT Trans Continent nyoe, jinoe teungoh geupejak program peutumbon lumo, di Desa Botumoputi, Kecamatan Tibawa, Kabupaten Gorontalo, Provinsi Gorontalo.

Pakon juoh that keudeh u Sulawesi? Karena di sinoe PT Trans Continent kalheuh geubangun weu lumo, lengkap ngen gudang teumpat kubah umpeun, dan lom geupula naleung khusus untuk umpeun lumo.

Bandum-bandum nyan, na lam kompleks kanto atawa basecamp PT Trans Continent yang luwah jih mungken jinoe ka lubeh siploh hektare.

CEO atawa Bos PT Trans Continent Dr. Ismail Rasyid SE, M.MTr, lam saboh haba bak kamoe uroe nyoe, Rabu (10/6/2026), geupeugah bahwa saat nyoe jumlah lumo yang kana adalah 150 boh.

Geupeugah lom, beliau nyan ka geusiapkan bandum fasilitas untuk target 1.000 boh lumo yang akan geupeulara dan geupeutumbon.

Jeuneh lumo yang geupeulara lam program nyoe nakeuh sapi bali, limousin, simental, brahman, dan laen-laen.

Jinoe 150 boh lumo, lam watee toe tatamah lom hingga jeut keu 500 boh lumo, sampe akhe jih punoh weu 1.000 boh lumo. Tapeugrak meutahap dan beumeusaneut, meunan geupeugah le Bang Ismail.

Geupeugah lom, lumo-lumo jenis lokal yang kana nyan geubloe dan geuba ngen kapai dari Sumbawa Nusa Tenggara Barat.

Bos PT Royal Indonesia nyoe geupeugah syit bahwa syarikat gaknyan geupakek 100 droe lubeh awak kerja dari urueng gampong di seukeulileng basecamp, untok tanoum naleung, uroh umpeun, hingga peulara lumo.

Syedara lon, PT Trans Continent mulai geupeujak buet di Gorontalo sejak thon 2024.

Walaupun gohlom genap dua thon, syarikat milek ureung Aceh nyoe jonoe kajeut keu andalan Poprintah Provinsi Gorontalo untuk geulayani ekspor-impor hase bumoe.

Ulee Poprintah atawa Gubernur Gorontalo Gusnar Ismail ka padum-padum go geujak saweu basecamp Trans Continent, dan geubri dukungan punoh keu Toke Ismail Rasyid, untuk peubeudoh ekonomi masyarakat Gorontalo.

Warga masyarakat di Gorontalo pih cukop seumangat dan geuteurimong ngen jroh kehadiran PT Trans Continent, karena dengan na syarikat nyoe, ureung gampong na keureuja dan buet, dari peulara lumo, hingga peusapat sahe lampoh yang akan dikirem u luwa Gorontalo.

Syedara Lon, meumada ohnoe berita lam bahasa Aceh uroe nyoe. Tameudoa ureung Aceh beusabe lam jroh dan sabe lam lindungan serta rahmat Allah.

Wassalamualaikum warahmatullahi wabarakatuh.

Editor: Aldi Rani
Host: Zainal Arifin

Baca juga: VIDEO Berita Lam Bahasa Aceh - Kapolda Aceh Peuturi Buku Polda Aceh Meutuah

Baca juga: VIDEO Berita Lam Bahasa Aceh - Tutue Kutablang Ka Dibuka Lom

Baca juga: VIDEO Berita Lam Bahasa Aceh, Seumarak Idul Adha Ureung Aceh di Amerika