VIDEO - Mualem, Dek Fadh, Sekda, dan Ketua DPRA Duek Pakat Bahas Revisi UUPA

SERAMBINEWS.COM - Gubernur Aceh, Muzakir Manaf atau yang lubeh dituri ngen nan Mualem, uroe nyoe, Aleuhad (24/5/2026), geuduek pakat ngen ulee-ulee peumeurintah Aceh, untuk geupeusaboh su lam proses revisi Undang-undang Pemerintah Aceh atawa UUPA.

Di antara ulee kudoe yang ikot acara duek pakat nyoe nakeuh, Waki Gubernur Fadhlullah atawa Dek Fadh, Sekeuretareh Daerah atawa Sekda Aceh, Nasir Syamaun, dan Keutuha DPRA, Zulfadhli alias Abang Samalanga.

Baca juga: Mualem Sebut Revisi UUPA Bertujuan Cegah Potensi Konflik Aceh di Masa Depan

Informasi nyang kamoe teurimong dari Juru Bicara Pemerintah Aceh, Doto Nurlis Effendi, duek pakat nyoe geupeugot bak kanto Penghubung Aceh, di Jakarta. 

Ureung-ureung nyang ikot lam duek pakat nyoe nakeuh Tim Pembahas Revisi UUPA dari Pemerintah Aceh dan DPR Aceh.

Teumasok Juru Bicara Pemerintah Aceh Dr Nurlis Effendi dan Teuku Kamaruzzaman (Ampon Man), ureung nyan nakeuh bagian dari Tim Pembahas Revisi UUPA dari Pemerintah Aceh syit.

Hase dari duek pakat nyoe akan geuba lam rapat deungo pendapat atawa Rapat Dengar Pendapat (RDP) Banleg DPR-RI dan DPR Aceh bak ruang Banleg DPR-RI, Jakarta, yang akan geupeugot nibak uroe Senin (25 Mei 2026) singoh.

Lam rapat nyan, Mualem antara laen geupeugah nyang bahwa di antara hai nyang cukop peunteng lam revisi UUPA nyoe, nakeuh tentang kewenangan Pemerintah Aceh nyang seusuai ngen MoU Helsinki.

Baca juga: Fraksi Golkar DPRA Bahas Revisi UUPA, Usulkan Dana Otsus Berlaku Sepanjang Usia UU

Meunyo kewenangan lagee nyang diato lam MoU nyoe hana dibri, maka geutanyoe hanjeut tapeugot sapeu. Jadi, revisi UUPA nyoe sangat peureulee untuk tapeugeshe potensi konflik Aceh di masa hadapan, meunan geupeugah le Mualem.

Seulain soal kewenangan Pemerintah Aceh, Mualem juga gelakee Tim Pembahas UUPA beufokus nibak persoalan sinambong Dana Otsus Aceh. 

Geutamah le Mualem, geutanyoe kalheuh talakee Dana Otsus Aceh nyan nakeuh 2,5 persen dari Dana Alokasi Umum (DAU) Nasional, atau minimal sama dengan Papua. 

Waki Gubernur Aceh Fadlullah atawa Dek Fadh sepakat ngen Mualem untuk sama-sama geupeujuang revisi UUPA nyoe.

Dek Fadh geupeugah cukop yakin geuh Pemerintah Pusat akan geukabulkan peu nyang geulakee le ureung Aceh nyang meukayet ngen Dana Otsus.

Baca juga: Mualem Minta BPJS Buka Blokir JKA

Nyang peunteng cara geutanyoe beu kompak bandum dan beumeusaneut watee tapeusampoe harapan nyoe, meunan geupeugah le Dek Fadh.

Sekda Aceh, Nasir Syamaun dan Ketua DPR Aceh, Zulafdhli atawa Abang Samalanga pih kompak siap geudukung peu nyang akan geupeujak le Mualem.

Watee kamoe peusampoe pandangan lam RDP ngen Banleg DPR RI, kamoe akan peusampoe sikap Aceh nyoe, meunan geupeugah le Abang Samalanga.

Syedara Lon, meumada ohnoe berita lam bahasa Aceh uroe nyoe. Beurita leungkap jeut neubaca bak koran Serambi Indonesia edisi Senin 25 Mei 2026. 

Bek tuwo neuteugon tombol like dan subscribe di baroh nyoe agar update sabe berita dari nanggroe. 
Wassalamualaikum warahmatullahi wabarakatuh.(*)